Takim me Palët e Interesuara, Integrimi i Substancave të Kontrolluara të Padëshiruara dhe të Përdorura në Sistemin e Menaxhimit të Mbetjeve në Shqipëri
24/10/2025
Takim ndërgjegjësues me studentet e Universitetit Barleti mbi klimën, 3R dhe rolin e vajzave në sektorin RAC
19/11/2025
Në Tiranë u zhvillua sot Forumi i Dytë Vjetor mbi Ozonin dhe Klimën, një aktivitet që synon të forcojë angazhimet e Shqipërisë për mbrojtjen e shtresës së ozonit dhe reduktimin e gazrave me efekt serrë.
Në eventin e organizuar nga Ministria e Mjedisit dhe Njësia Kombëtare e Ozonit, në bashkëpunim me Organizatën e Kombeve të Bashkuara për Zhvillim Industrial (UNIDO) dhe Programin e Kombeve të Bashkuara për Mjedisin (UNEP), politikëbërësit, ekspertët dhe teknikët e sektorit të ftohjes u mblodhën për të diskutuar detyrimet e Shqipërisë në kuadër të Protokollit të Montrealit dhe procesit të integrimit europian.
Ministri i Mjedisit, Sofjan Jaupaj theksoi se Shqipëria po ecën me ritme të shpejta drejt përputhjes së plotë me standardet e Bashkimit Europian, në kuadër të Kapitulllit 27 – Mjedisi dhe Ndryshimet Klimatike. Ai u ndal te masat e reja ligjore për kontrollin e gazrave ftohës HFC/HCFC dhe angazhimin për të mos lejuar çlirimin e tyre në atmosferë në fund të jetës së pajisjeve ftohëse.
“Një element shumë i rëndësishem i kêtij kuadri është përcaktimi që proceset e rikuperimit, riciklimit, rigjenerimit apo shkatërrimit të gazeve serrë të floruara të realizohen vetem nga persona dhe subjekte që zotërojnë certifikatën përkatëse. Eshtë e rëndësishme te theksohet se certifikimi kryhet në perputhje me standardet e Bashkimit Europian. Ky standardizim siguron profesionalizem teknik, mbrojtje te mjedisit dhe siguri për shëndetin e punonjësve dhe konsumatorëve. Përmes këtyre reformave, Shqiperia po përgatitet të ecë përpara në procesin e negociatave për Kapitullin 27 – Mjedisi dhe Ndryshimet Klimatike. Kuadri ynë ligjor per gazet serrë te floruara dhe për substancat ozonholluese do te perputhet me tej me rregulloret e reja të BE-së, duke krijuar bazat për një ekonomi të qëndrueshme dhe per një treg që funksionon sipas standardeve evropiane.”- u shpreh Ministri i Mjedisit, duke vlerësuar kontributin e Njësisë Kombëtare të Ozoni në këtë proces.
Zëvendësministrja e Infrastrukturës dhe Energjisë, Enkelejda Muçaj, nënvizoi rëndësinë e eficencës energjetike si një nga shtyllat kryesore të reduktimit të emetimeve dhe mbrojtjes së klimës. Ajo theksoi se për të arritur objektivat kombëtare dhe europiane, është thelbësor forcimi i bashkëpunimit mes institucioneve, veçanërisht mes Ministrisë së Energjisë dhe Ministrisë së Mjedisit.
Pjesëmarrësit trajtuan sfidat dhe prioritetet e vendit në zbatimin e sistemit 3R – Rikuperim, Riciklim dhe Ripërdorim të gazrave ftohës, një praktikë e re për Shqipërinë dhe një kërkesë kyçe e legjislacionit të BE-së për reduktimin e gazrave me potencial të lartë të ngrohjes globale.
Gjatë diskutimeve u theksua nevoja për:
- forcimin e kuadrit ligjor dhe nënligjor për administrimin e kuotave dhe licencave;
- pajisjen e teknikëve me trajnime dhe certifikim të detyrueshëm;
- investime në pajisje për rikuperimin dhe riciklimin e gazrave;
- ndalimin e çlirimit në ajër të gazrave HCFC/HFC në fund të jetës së pajisjeve ftohëse;
- rishikim të ligjit për gazrat ftohës she afrimin e mëtejshëm me standardet e Bashkimit Europian;
- rritjen e kontrollit për operatorët ekonomikë
Përfaqësuesit e UNIDO-s dhe UNEP-it vlerësuan progresin e Shqipërisë, duke theksuar respektimin e standardeve ndërkombëtare dhe gatishmërinë e vendit për të ecur përpara me projekte modernizuese në sektorin e gazrave ftohës.
Ata konfirmuan mbështetje për trajnimin e teknikëve RAC dhe Rritjen e kapaciteteve për rikuperim, riciklim dhe rigjenerim.
Një nga konkluzionet kryesore të Forumit të Dytë Vjetor mbi Ozonin dhe Klimën ishte se implementimi i 3R në sektorin e gazrave ftohës është një hap i domosdoshëm për integrimin europian, mbrojtjen e klimës dhe garantimin e një tregu modern dhe të sigurt të pajisjeve ftohëse në Shqipëri.
