Trajnim për Teknikët RAC: Praktikat më të Mira në Shërbimin Teknik dhe Mirëmbajtjen

Më 2–3 mars 2026, Njësia Kombëtare e Ozonit (NOU), në bashkëpunim me UNEP dhe Kolegjin “Harry Fultz”, organizoi në Tiranë një trajnim dy-ditor me titull “Trajnimi për Teknikët RAC: Praktikat më të Mira në Shërbimin Teknik dhe Mirëmbajtjen.” Trajnimi u zhvillua në kuadër të një projekti të udhëhequr nga UNEP.

Trajnimi mblodhi rreth 41 teknikë të rinj të ftohjes dhe kondicionimit të ajrit (RAC) nga e gjithë Shqipëria, duke reflektuar përfshirjen në rritje të profesionistëve të rinj në këtë sektor. Kolegji “Harry Fultz” luan një rol të rëndësishëm në mbështetjen e zhvillimit profesional të teknikëve RAC përmes programeve të formimit profesional dhe certifikimit.

Objektivi i trajnimit ishte forcimi i kapaciteteve teknike të teknikëve RAC për të servisuar pajisjet e ftohjes dhe kondicionimit në mënyrë të sigurt, efikase dhe miqësore me mjedisin, në përputhje me detyrimet e Protokollit të Montrealit dhe me rregulloret kombëtare për substancat që dëmtojnë shtresën e ozonit dhe gazrat serrë të fluorizuar.

Pjesa e parë e trajnimit përbëhej nga prezantime teorike dhe diskutime, të fokusuara në aspektet kryesore të praktikave të mira të shërbimit teknik në sektorin RAC. Gjatë këtij sesioni, pjesëmarrësit analizuan ndikimin mjedisor të ftohësve (refrigerantëve) dhe rëndësinë e kontrollit të emetimeve të substancave që dëmtojnë ozonin dhe të refrigerantëve me potencial të lartë të ngrohjes globale (GWP). Vëmendje e veçantë iu kushtua rolit të rëndësishëm të teknikëve RAC në mbështetjen e proceseve të eliminimit gradual (phase-out) dhe reduktimit gradual (phase-down) të këtyre substancave, sipas afateve të përcaktuara nga Protokolli i Montrealit.

Diskutimet përfshinë gjithashtu praktikat më të mira për instalimin, shërbimin teknik dhe mirëmbajtjen e duhur të sistemeve RAC, duke theksuar se ndjekja e procedurave korrekte mund të rrisë efikasitetin energjetik dhe të ulë ndjeshëm rrjedhjet e refrigerantëve. Pjesëmarrësit u njohën gjithashtu me menaxhimin e sigurt të ftohësve, përfshirë alternativat të ndezshme dhe me GWP të ulët, të cilat po përdoren gjithnjë e më shumë si zgjidhje miqësore me mjedisin.

Tema të tjera të trajtuara përfshinë metodat për zbulimin efektiv të rrjedhjeve dhe rëndësinë e mirëmbajtjes parandaluese për të siguruar funksionimin e qëndrueshëm të sistemeve RAC. Theks i veçantë iu dha praktikave të rikuperimit, riciklimit dhe ripërdorimit të ftohësve, si masa thelbësore për të reduktuar emetimet dhe për të minimizuar nevojën për importe të reja refrigerantësh. Këto sesione u ofruan pjesëmarrësve njohuri teknike të përditësuara, duke forcuar njëkohësisht rëndësinë e respektimit të standardeve mjedisore dhe procedurave të sigurisë në aktivitetet e përditshme të servisimit.

Pjesa e dytë e trajnimit u fokusua në sesione praktike (hands-on) të zhvilluara në laboratorin teknik të Kolegjit “Harry Fultz” në Tiranë. Për të siguruar pjesëmarrje aktive dhe mësim efektiv, teknikët u ndanë në grupe të vogla pune me nga 4–5 pjesëmarrës. Kjo qasje i lejoi secilit teknik të praktikonte procedurat dhe të përdorte pajisjet nën drejtimin dhe mbikëqyrjen e trajnerëve me përvojë.

Gjatë sesioneve praktike, pjesëmarrësit punuan me pajisje të specializuara për servisimin RAC dhe ushtruan procedura kyçe si rikuperimi, riciklimi dhe ripërdorimi i ftohësve, si dhe teknikat e duhura të karikimit dhe vakumimit të sistemeve. Teknikët fituan gjithashtu përvojë praktike në përdorimin e makinave të rikuperimit, njësive të riciklimit, pompave vakum dhe pajisjeve për zbulimin e rrjedhjeve.

Ky komponent praktik u mundësoi pjesëmarrësve të shndërronin njohuritë teorike në praktika reale servisimi. Duke punuar drejtpërdrejt me pajisjet dhe duke kryer vetë procedurat, teknikët forcuan aftësitë e tyre teknike dhe përmirësuan kuptimin e menaxhimit të qëndrueshëm dhe miqësor me mjedisin e ftohësve, në përputhje me objektivat e Protokollit të Montrealit.

Ky trajnim përfaqëson një hap të rëndësishëm në forcimin e kapaciteteve teknike të sektorit të servisimit RAC në Shqipëri. Pjesëmarrja e lartë dhe angazhimi aktiv i teknikëve treguan përkushtimin e vazhdueshëm të sektorit për përmirësimin e aftësive profesionale dhe për adoptimin e praktikave moderne të shërbimit teknik, Hmiqësore ndaj mjedisit.