Dita Botërore e Ozonit në Shkollën Profesionale “Karl Gega”, kur teknologjia miqësore me klimën bëhet realitet
23/09/2026
Rigjenerimi i gazeve ftohëse: përvoja më e mirë e Polonisë për Shqipërinë
30/10/2026
Tiranë, 22–23 tetor 2026
Në kuadër të zbatimit të Projektit “Plani i Zbatimit të Amendamentit të Kigalit (KIP) – Faza I për Shqipërinë”, Njësia Kombëtare e Ozonit (NOU), në bashkëpunim me Kolegjin “Harry Fultz”, organizoi më 22–23 tetor 2026 një trajnim dyditor me temë “Amendamenti i Kigalit: Refrigerantët me GWP të ulët në sektorin e ftohjes dhe ajrit të kondicionuar (RAC)”.
Në aktivitet morën pjesë 25 teknikë të sektorit të ftohjes dhe ajrit të kondicionuar, me qëllim forcimin e njohurive dhe aftësive profesionale për përdorimin e sigurt dhe efikas të refrigerantëve alternativë me ndikim më të ulët në klimë.
Trajnimi u organizua në dy komponentë: teorik dhe praktik, duke ndërthurur njohuritë mbi kërkesat e Amendamentit të Kigalit me demonstrimet dhe ushtrimet praktike për mirëmbajtjen dhe shërbimin e pajisjeve të ftohjes dhe ajrit të kondicionuar.
Pjesa teorike
Pjesa teorike u përqendrua në objektivat e Amendamentit të Kigalit për reduktimin gradual të hidrofluorokarbureve (HFC), angazhimet e Shqipërisë në kuadër të Protokollit të Montrealit dhe rëndësinë e kalimit drejt teknologjive me ndikim më të ulët në klimë.
U trajtuan karakteristikat dhe aplikimet e refrigerantëve alternativë, përfshirë refrigerantët natyrorë R-290, R-600a dhe R-744, si dhe kërkesat teknike dhe të sigurisë për përdorimin e tyre. Vëmendje e veçantë iu kushtua parandalimit të rrjedhjeve, praktikave të mira të shërbimit dhe eficiencës së energjisë.
Pjesa praktike
Pjesa praktike u fokusua në demonstrimin e procedurave të sigurta të punës me refrigerantët alternativë. Pjesëmarrësit u njohën me përdorimin e pajisjeve të përshtatshme të shërbimit, identifikimin e refrigerantëve, kontrollin e rrjedhjeve, testimin e hermeticitetit, rikuperimin e refrigerantëve, vakumimin dhe mbushjen e sistemeve.
Theks i veçantë iu kushtua masave të sigurisë gjatë punës me refrigerantët e ndezshëm.
Rezultatet dhe kontributi në zbatimin e projektit KIP
Ky trajnim kontribuoi në rritjen e kapaciteteve profesionale të teknikëve shqiptarë, promovimin e praktikave të mira të shërbimit dhe përgatitjen e sektorit RAC për përdorimin e teknologjive më miqësore me klimën dhe më eficiente në energji.
Aktiviteti mbështet zbatimin e Amendamentit të Kigalit në Shqipëri dhe objektivat e projektit KIP – Faza I për reduktimin gradual të konsumit të HFC-ve dhe promovimin e alternativave me GWP të ulët.
