TRAJNIM DYDITOR MBI AMENDAMENTIN E KIGALIT DHE ALTERNATIVAT ME GWP TË ULËT NË SEKTORIN E FTOHJES DHE AJRIT TË KONDICIONUAR
16/06/2026
Njësia Kombëtare e Ozonit celebroi Ditën Botërore të Ftohjes me një seri aktivitetesh që bënë bashkë rreth 40 teknikë, operatorë ekonomikë, importues, akademikë dhe përfaqësues institucionalë të sektorit të ftohjes dhe kondicionimit (RAC). Aktivitetet, të organizuara në bashkëpunim me Tirana College of Technology dhe me mbështetjen e UNIDO dhe UNEP, u zhvilluan në kuadër të fushatës globale “Cool Intelligence”.
Tema e këtij viti vë theksin te ndërthurja e teknologjisë me njohuritë profesionale dhe aftësitë e njerëzve që e projektojnë, e instalojnë dhe e mirëmbajnë atë, me synimin për të nxitur një tranzicion më të shpejtë drejt zgjidhjeve të ftohjes më të qëndrueshme.
Pjesëmarrësit u njohën me rëndësinë e Ditës Botërore të Ftohjes dhe rolin që sektori i ftohjes luan në jetën moderne. Prezantimet evidentuan kontributin e ftohjes në sigurinë ushqimore, ruajtjen e barnave dhe vaksinave, funksionimin e qendrave të të dhënave, proceseve industriale dhe një game të gjerë shërbimesh nga të cilat varet jeta e përditshme. U theksua gjithashtu se kjo ditë synon të rrisë ndërgjegjësimin për rëndësinë e sektorit dhe profesionistëve që e mbajnë atë në funksionim.
Pjesëmarrësit u informuan gjithashtu mbi alternativat e reja të gazeve ftohës me GWP të ulët dhe rolin e tyre në zbatimin e Amendamentit të Kigalit. Ata u njohën me drejtimin që po merr industria globale e ftohjes, teknologjitë që po zëvendësojnë gradualisht gazet me ndikim të lartë klimatik dhe kërkesat e reja që këto zhvillime sjellin për teknikët, operatorët ekonomikë dhe importuesit.
Pjesë e aktiviteteve ishte edhe ceremonia e ndarjes së certifikatave për 24 teknikë të ftohjes dhe kondicionimit të trajnuar dhe certifikuar nga Centro Studi Galileo (Itali). Certifikimi sipas standardeve evropiane dëshmon se teknikët zotërojnë kompetencat profesionale për instalimin, mirëmbajtjen, rikuperimin e gazrave ftohës dhe kontrollin e rrjedhjeve në sistemet RAC që përdorin F-gaze.
Certifikatat njihen zyrtarisht në vendet e Bashkimit Evropian dhe përbëjnë një vlerësim të rëndësishëm të aftësive profesionale në sektor. Deri më sot, me këtë certifikim janë pajisur 58 teknikë shqiptarë. Emrat e tyre regjistrohen në Regjistrin Evropian të Teknikëve, duke mundësuar verifikimin e kualifikimit profesional dhe aksesin në tregun evropian të punës në sektorin RAC.
Aktivitetet u përmbyllën me një koktej të organizuar nga Njësia Kombëtare e Ozonit, gjatë të cilit pjesëmarrësit vijuan diskutimet mbi zhvillimet e fundit në sektor dhe sfidat që shoqërojnë tranzicionin drejt teknologjive më të avancuara dhe më miqësore me klimën.
