Shqipëria në Ditën Botërore të Ftohjes: Nga rëndësia e ftohjes në jetën moderne tekteknologjitë e së ardhmes
26/06/2026
Dita Botërore e Ozonit në Shkollën Profesionale “Karl Gega”, kur teknologjia miqësore me klimën bëhet realitet
23/09/2026
Fëmijët dhe të rinjtë ishin këtë vit protagonistë të një serie aktivitetesh që i afruan me çështjet e ozonit dhe klimës përmes edukimit, artit, sportit dhe formimit profesional.
Në disa shkolla publike të vendit dhe në mjedise passhkollore, ata u njohën me historinë e suksesit të mbrojtjes së shtresës së ozonit, mësuan për lidhjen e saj me klimën dhe u përfshinë në aktivitete që i bënë këto tema pjesë të edukimit, krijimtarisë dhe formimit të tyre.
Në shkollën profesionale “Karl Gega”, Dita Botërore e Ozonit u lidh drejtpërdrejt me formimin profesional dhe teknologjinë e së ardhmes. Sistemi i ri me pompa nxehtësie që përdorin refrigerantin natyror R290, me GWP vetëm 3, u prezantua së bashku me një workshop për nxënësit e profilit Termohidraulikë. Sistemi do të shërbejë si mjedis praktik mësimor, ku nxënësit mund të njihen nga afër me një teknologji me ndikim shumë të ulët në klimë. Synimi është që përvoja e “Karl Gegës” të shërbejë si model për përdorimin e këtyre teknologjive në shkolla të tjera profesionale në Shqipëri dhe më gjerë në rajon.
Në shkollën 9-vjeçare “Mustafa Qemal Ataturk” në Sauk, fëmijët u njohën me mesazhet për mbrojtjen e shtresës së ozonit, klimën dhe mjedisin përmes dy formave të ndryshme të përfshirjes. Në workshop-in artistik “Imagjinata ime”, informacionin dhe idetë e diskutuara i sollën më pas përmes ngjyrave dhe vizatimeve. Ndërsa mini-kampionati i volejbollit Kupa “Ozoni” e çoi ndërgjegjësimin edhe në fushën e sportit: katër skuadrat luajtën të veshura me ngjyrat dhe mesazhet zyrtare të Ditës Botërore të Ozonit 2026, duke e kthyer sportin në një tjetër formë ndërgjegjësimi për ozonin dhe klimën.
Mesazhi shkoi edhe përtej mjedisit të shkollës. Në “The Afterschool House”, fëmijët e moshës 5–10 vjeç u njohën me shtresën e ozonit dhe ndryshimet klimatike përmes një videoje të përshtatur për moshën e tyre, bisedës, pyetjeve dhe aktiviteteve krijuese. Një mënyrë për të treguar se ndërgjegjësimi për planetin, ozonin dhe klimën nuk kufizohet vetëm brenda shkollës.
Fushata u shtri edhe përtej Tiranës. Në bashkëpunim me Bashkinë Maliq, ekspozita e arteve pamore “Miq të klimës” mblodhi 36 autorë të vegjël nga zonat urbane dhe rurale të bashkisë. Punimet e tyre sollën këndvështrimin e fëmijëve për shtresën e ozonit, ndryshimet klimatike dhe mjedisin, duke e kthyer artin në një hapësirë për të mësuar, diskutuar dhe shkëmbyer ide.
Nga një fëmijë që zbulon për herë të parë pse na mbron shtresa e ozonit, te një nxënës që mëson të punojë me teknologjitë e së ardhmes, aktivitetet ndoqën të njëjtën ide: njohuritë, ndërgjegjësimi dhe aftësitë për mbrojtjen e ozonit dhe klimës ndërtohen që herët dhe zhvillohen bashkë me brezin e ri.
Dita Botërore e Ozonit 2026 u shënua nën moton “Global Action for a Cooler Planet”, në vitin që shënon edhe 10-vjetorin e Amendamentit të Kigalit të Protokollit të Montrealit.